எலெக்ட்ரிக் கார் பிரியர்களுக்கு புது அனுபவத்தை கொடுக்கும் விதமாக புதிய மின்சார வாகனத்தை எம்ஜி நிறுவனம் இந்தியாவில் அறிமுகப்படுத்தியுள்ளது. வின்ட்சர் என்று பெயரிடப்பட்டுள்ள இந்த கார் ரூ.9.99 லட்சம் எக்ஸ்ஷோரூம் விலையில் அறிமுகம் செய்யப்பட்டுள்ளது.
நீண்ட எதிர்பார்ப்புகளுக்கிடையில் புதிய விண்ட்சர் EV-யை இந்தியாவில் வெளியிட்டிருக்கிறது எம்ஜி மோட்டார். JSW நிறுவனத்துடன் கூட்டணி அமைத்த பிறகு அந்நிறுவனம் வெளியிடும் முதல் கார் இது. ஏற்கனவே இந்தியாவில் ZS EV மற்றும் காமெட் EV ஆகிய இரண்டு எலெக்ட்ரிக் கார்களை விற்பனை செய்து வருகிறது அந்நிறுவனம். அந்த கார்களைத் தொடர்ந்து, இந்தியாவில் மூன்றாவது எலெக்ட்ரிக் காராக இந்த விண்ட்சர் EV-யை வெளியிட்டிருக்கிறது எம்ஜி.
சேவை அடிப்படையில் பேட்டரி வசதி:
புதிய விண்ட்சர் EV-யில் பெரிய ட்விஸ்ட் என்னவென்றால் பேட்டரியை வாடகை அடிப்படையில் பயனாளர்களுக்காக வழங்கும் முறையில் இந்த விண்ட்சர் EV-யை வெளியிடுவதாக அறிவித்திருக்கிறது எம்ஜி மோட்டார்.
அதாவது, பேட்டரி நமக்கு சொந்தமாக இல்லை. பதிலாக, கிமீ அடிப்படையில் பயன்பாட்டிற்கு ஏற்ப அந்த பேட்டரிக்கு நாம் கட்டணம் செலுத்த வேண்டும். எலெக்ட்ரிக் கார்களின் விலை அதிகமாக இருப்பதற்கு அதன் பேட்டரிக்கள் தான் முக்கியக் காரணம். கிட்டத்தட்ட ஒரு எலெக்ட்ரிக் காரின் விலையில் 40% பேட்டரிக்கானதாகவே இருக்கும். அதனைக் குறைப்பதற்காகவே இந்த அடிப்படையில் புதிய காரை வெளியிட்டிருப்பதாகத் தெரிவித்திருக்கிறது எம்ஜி.
பார்ப்பதற்கு ஒரு பக்கா எம்பிவியைப் போலவே இருக்கிறது இந்த விண்ட்சர் EV. ஆனால், இந்தக் காரானது ஐந்து பேர் வரை அமர்ந்து பயணம் செய்யும் வகையில், இரண்டு வரிசை சீட்களுடன் மட்டுமே வடிவமைக்கப்பட்டிருக்கிறது. ஆனால், ஐந்து பேரும் சொகுசாக பயணம் செய்யும் வகையில் வடிவமைக்கப்பட்டிருக்கிறது என்பதையும் குறிப்பிட வேண்டும்.
டிசைனைப் பொறுத்தவரை மிகவும் மினிமலிஸ்டிக்காக, ஒரு எலெக்ட்ரிக் காருக்கே உரிய டிசைனைக் கொண்டிருக்கிறது விண்ட்சர் EV. முன்பக்கமும் பின்பக்கமும் காரின் முழு அகலத்திற்கும் LED லைட் பார்கள் கொடுக்கப்பட்டிருக்கின்றன.
முன்பக்க ஸ்டெப்டு அப் டிசைன் கொடுக்கப்பட்டிருக்கிறது. முகப்பு விளக்குகளானது கீழே பம்பரில் வைக்கப்பட்டிருக்கிறது. இது கொஞ்சம் புதுமையாகவும், அழகு சேர்க்கும் வகையிலும் இருக்கிறது.
வசதிகள்
வெளிப்புறத்தைப் போலவே உட்புறமும் மினிமலிஸ்டிக்காக மிகக் குறைவான அளவு டிசைனையே கொண்டிருக்கிறது. டேஷ்போர்டில் பெரிய 15.6 இன்ச் டச்ஸ்கிரீன் இன்ஃபோடெயின்மென்ட் டிஸ்பிளே கொடுக்கப்பட்டிருக்கிறது. இத்துடன் ஃப்ரீ ஃப்ளோட்டிங் டிஜிட்டல் இன்ஸ்ட்ரூமென்ட் கிளஸ்டரும் கொடுக்கப்பட்டிருக்கிறது.
முன்பக்க பேக்ரெஸ்டை நன்கு சாய்த்து ரெக்லைனர் சீட்டாகவும் மாற்றிக் கொள்ளலாம். பின்பக்கமும் நல்ல வசதியான ‘ஏரோ லௌஞ்’ சீட்களைக் கொடுத்திருக்கிறது எம்ஜி மோட்டார். முக்கியமாக கால் நீட்டி அமரும் வகையில் நல்ல லெக் ரூம் இருக்கிறது.
HVAC கண்டரோல்களுக்கு ஃபிசிக்கல் பட்டன்களே கொடுக்கப்பட்டிருக்கிறது. அது நடுவில் கொடுக்கப்பட்டிருக்கும் டிஸ்பிளேவிற்கு சற்று கீழே கொடுக்கப்பட்டிருக்கிறது. இதனைத் தவிர பனோரமிக் கிளாஸ்ரூஃப், வயர்லெஸ் சார்ஜிங் மற்றும் கனெக்டட் கார் டெக் ஆகிய வசதிகளும் புதிய விண்ட்சர் EV-யில் கொடுக்கப்பட்டிருக்கின்றன. இந்தக் காரில் 60:40 ஸ்பிளிட் சீட்டுடன், 604 லிட்டர் பூட் ஸ்பேஸும் கொடுக்கப்பட்டிருக்கிறது.
பேட்டரி மற்றும் வரம்பு
வாடகை அடிப்படையிலான பயன்பாட்டைக் கொண்ட 38kWh LFP பேட்டரியை விண்ட்சர் EV-யில் கொடுத்திருக்கிறது எம்ஜி மோட்டார். இந்த பேட்டரியானது 331 கிமீ ரேஞ்சைக் கொண்டிருக்கிறது. காரின் பேட்டரியை பயன்படுத்த கிமீ ரூ.3.5 கட்டணமாக செலுத்த வேண்டும். இந்த எலெக்ட்ரிக் காரில் 136hp பவர் மற்றும் 200Nm டார்க்கை உற்பத்தி செய்யக்கூடிய எலெக்ட்ரிக் மோட்டார் முன்பக்க ஆக்சிலில் பொருத்தப்பட்டிருக்கிறது. எக்கோ+, எக்கோ, நார்மல் மற்றும் ஸ்போர்ட் என நான்கு ரைடிங் மோடுகளைக் கொண்டிருக்கிறது இந்த எலெக்ட்ரிக் கார்.
வேரியன்ட்கள் மற்றும் விலை
இந்தப் புதிய எலெக்ட்ரிக் காரை எக்ஸைட், எக்ஸ்க்ளூஸிவ் மற்றும் எஸ்ஸன்ஸ் என மூன்று வேரியன்ட்களாக, ஸ்டார்பர்ஸ்ட் பிளாக், பியர்ல் வைட், கிளே பெய்ஜ் மற்றும் டார்கைஸ் கிரீன் ஆகிய நான்கு நிறங்களில் வெளியிட்டிருக்கிறது எம்ஜி மோட்டார்.
இந்த எலெக்ட்ரிக் காரை ரூ.9.99 லட்சம் எக்ஸ்-ஷோரூம் தொடக்க விலையில் இந்தியாவில் வெளியிட்டிருக்கிறது எம்ஜி. இந்த விலையில் பேட்டரிக்கான தொகை சேர்க்கப்படவில்லை. மேலே கூறியது போல் அது வாடகை முறையி்ல கிமீ-க்கு ரூ.3.5 என்ற விலையில் வழங்கப்படுகிறது.
முதலில் வரும் வாடிக்கையாளர்களுக்கு கூடுதல் சலுகை அளிக்கும் வகையில், பேட்டரிக்கு வாழ்நாள் வாரண்டி அளிக்கிறது எம்ஜி. மேலும், ஒரு வருடத்திற்கு பொது இடங்களில் இலவசமாக சார்ஜ் செய்து கொள்ளலாம் எனவும் அறிவித்திருக்கிறது.
எம்ஜி விண்ட்சர் EV-க்கான முன்பதிவு அக்டோபர் 3ம் தேதி தொடங்குகிறது. டெலிவரி அக்டோபர் 13ம் தேதியன்று தொடங்குகிறது.
JSW and MG Motor India have launched the Windsor EV, an electric crossover utility vehicle priced at Rs 9.99 lakh. Learn more about its features, pricing, and market impact in India.
